کسی بھی مقدّمہ میں خو اہ اس کی نوعیت دیوانی ہو یا فوجداری ان کے فیصلوں کی نقول کے حصول کا طریقہ کار مُدّعی مثتغیث، ڈگری دار، مدّعی علیہ یا ملزم کیلئے عمومًا مشکلات کا سبب بنتا ہے اور بعض اوقات لا علمی کی بناء پر ان مقدمّات کی نقل حاصل کرنے کیلئےغیر ضروری اخراجات کا سامنا بھی کرنا پڑتا ہے-

حصول نقل کیلئے ایک مقررّہ طریقہ کار ہے جس کیلئے ایک فارم مرتّب کیا گیا ہےجو کہ ضلع کچہری یا متعلقہ عدالت سے باآسانی دستیاب ہے- جس میں مختلف کالم بنے ہوتے ہیں، جن میں درج ذیل کوائف درج کرناضروری ہیں-

1- مقدّمہ کی نوعیت کہ آیا مقدّمہ دیوانی، فوجداری، متفّرق، ابتدائی یا اپیل کی نوعیت کا ہے-

2- مقدّمہ کے فریقین کے نام جس میں سائل مُدّعی، مثتغیث یا مدعا علیہ یا ملزم شامل ہیں-

3- دعویٰ کی نوعیت، اگر مقدّمہ یا جائیداد کی بابت ہو تو اس جگہ کا نام جہاں جائیداد متنازعہ واقع ہے یا اگر اس کے علاوہ کوئی دیگر تنازعہ یا کوئی جرم واقع ہواہےتو اس جگہ کا نام جہاں تنازعہ پیداہواہے یا جہاں جرم سرزد ہواہے-

4- عدالت اور جج کا نام اور یہ کہ ماتحت عدالت ہے یا عدالت اپیل ہے اور کس تاریخ پر فیصلہ ہوا ہے-

5- وجہ بتانا ہوگی کہ کس مقصد کیلئے نقل درکار ہےاور مطلوبہ نقول کی تفصیل-

6- درخواست گزار کا نام اورمکمل پتہ، تحصیل اور تھانہ، اپنا پیشہ، ذات، ولدیت، اورپورانام صاف صاف لکھناہوگا-

اس کے بعد درخواست برائے نقول مقدّمہ متعلقہ نقول برانچ میں جمع کرانی پڑتی ہے- متعلقہ مقدّمہ کی نقول کیلئے فارم پر مقررہ کورٹ فیس لگانا پڑتی ہے- اگر نقول فوری طورپر درکار ہوں تو اس کیلئے اضافی کورٹ فیس مبلغ 10 روپے اداکرنا ہوگی- لیکن اگر نقول معمول(ordinary) کے طریقے سے مطلوب ہوں تو اس کی کورٹ فیس اس کی کورٹ فیس چارروپے تک ہے- البتہ تیاری کی نقل کے بعد اس کے حصول کے وقت اگر صفحات کی تعداد زیادہ ہو تو اس کے مطابق زیادہ کورٹ فیس لگانی پڑتی ہے- جس کی مالیت 2 روپے فی صفحہ ہے۔

عدالت عالیہ سے نقول کے حصول کا طریقہ کار بھی وہی ہے جو کہ نچلے درجے کی عدالت کیلئے اختیارکیا جاتا ہے نقل کے حصول کا فارم باآسانی ضلع کچہری یا عدالت عالیہ کے احاطے سے بھی دستیاب ہے جس کے شروع میں متعلقہ عدالت عالیہ کا نام درج کرنا ہوگامثلاً سندھ ہائی کورٹ۔اس کے ضروری لوازمات درج ذیل ہیں-

درخواست گزار کا نام

مقدّمہ کا نام

تاریخ

جمع شدہ رقم (کورٹ فیس، اسٹامپ کی صورت میں)

مقدّمہ نمبر

دوسری پارٹی کا نام

پکّی پیشی کی تاریخ کا اندراج

کچّی پیشی کا اندراج

اگر مقدّمہ کو دو جج صاحبان نے سُنا ہے تو ان کا نام ترتیب وار درج کرنا پڑے گا اس کے بعد دس روپے کا کورٹ فیس ٹکٹ چپساں کرنا ضروری ہے -فارم کے آخر میں درخواست گزار کو جس مقدّمہ یا مقدّمات کی مصدقّہ نقول مطلوب ہوں اس کی تعداد اور درخواست گزار کا نام، پتہ، تاریخ اور دستخط درج ہونگے- جس کے بعد درخواست متعلقہ برانچ فوجداری یا دیوانی کے محافظ ریکارڈ کے پاس جمع کرانی ہو گی جب کہ عدالت عظمٰی کی کاروائی کی نقول حاصل کرنے کیلئے بھی یہی طریقہ کار اپناناپڑتاہے اور درخواست حصو لِ نقل میں مقدّمہ نمبر، عنوان، پارٹی کا نام اور دستاویزات کی تفصیل جن کی نقول درکار ہیں، آیا درخواست گزار اس مقدّمہ میں پارٹی ہے، نقول کس مقصد کیلئے درکار ہیں اور اس پر مقررہ کورٹ فیس مُنسلک کرنا ہوگی۔اس کے ساتھ قومی شناختی کارڈ بھی مُنسلک کرنا ضروری ہے اور آخر میں نام اور دستخط کے ساتھ قومی شناختی کارڈ نمبر درج کرنا ہوگا-

درخواست جمع کرانے کے بعد متعلقہ اہل کار سے اس کی رسید حاصل کرنا چاہیئے جس پر نمبر اور تاریخ درخواست درخواست اور تیاری نقل کی تاریخ درج ہوتی ہے-

واضح رہے کہ عدالتی کاروائی کی نقول حاصل کرنے کے مندرجہ بالا تینوں قسم کے فارم لاء اینڈ جسٹس کمیشن آف پاکستان کی ویب سائٹ www.ljcp.gov.pk/0-publicawarenessprogram.htm پر موجود ہیں-

مزید معلومات کیلئے حسب ذیل پتہ پر رابطہ کیا جا سکتا ہے-

ریسرچ آفیسر II

فون نمبر 9220483 ، 9209412-051

فیکس نمبر 9214416-051

ای میل ljcp@ljcp.gov.pk